U Crnu Goru jučer stiglo više od 3,5 tona medicinske i zaštitne opreme koju je osigurao vlasnik "Adriatic Propertisa" i "Universal Capital Banke" Petros Stathis. Avion kompanije "FlyDubai" dopremio je u Crnu Goru 600.000 medicinskih maski, 100.000 medicinskih rukavica, 79.000 maski N95 i 21.700 maski za lice. 

U pismu koje je Stathis uputio Nacionalnom koordinacionom tijelu naveo je da ovo najteže vrijeme u kojem je COVID-19 rastrojio društvenu zajednicu, kako lokalno, tako i globalno. Poručio je da u ovim trenucima Crna Gora nije sama i nije mala.

- Neupitno smo suočeni sanovim i užasnim protivnikom koji ulazi u naš svakodnevni život i drastično ga mijenja. Zdravlje svih nas je osnovno dobro i od suštinske je važnosti da adekvatna lična zaštitna i medicinska oprema budu dostupni svima - naveo je on.

Stathis je naglasio da mu se javilo i nekoliko institucija i privatnih osoba koje su izrazile spremnost da pomognu Crnoj Gori i o tome je već obavijestio Vladu Crne Gore.

- Sljedeći teretni avion je već popunjen potrebnom opremom i upravo sada tražimo treći koji može prevesti i veće količine zaliha do aerodroma u Podgorici. Molim vas čuvajte zdravlje, budite odgovorni i svi ćemo se veseliti predstojećem ljetu - najavio je Stathis.