Zdravko Krivokapić, premijer Crne Gore, kazao je da u pregovorima o rekonstrukciji nije problem Vlada, niti njeni rezultati.

- Ovdje nije problem Vlada ni rezultati Vlade koje svi osporavaju. Problem je što neko namjerno i nenamjerno neće da rješava probleme, a glavni problem je Tužilaštvo - kazao je Krivokapić novinarima nakon otvaranja Digitalnog Samita Zapadnog Balkana.

Krivokapić je kazao da se radi punim kapacitetom.

- Mi radimo punim kapacitetom, programski djelujemo i pokušavamo sve što je do nas da uradimo. Svi neka se bave sa onim što je njihova nadležnost. Ja kada dođem na ovakav skup vrlo se osjećam loše jer imamo toliku snagu i mogućnost, ali ne umijemo da je iskoristimo - rekao je Krivokapić.

Prema njegovim riječima, očekuje da će lideri imati razumijevanja i dozvoliti da ova Vlada traje.

- Ako sam ja problem vrlo jednostavno to riješite - ako vam to ne odgovara svrgnite premijera. Ako želite izbore recite to građanima - kazao je Krivokapić.

Na pitanje novinara da li želi DF u Vladi, Krivokapić je kazao:

- Ja sam premijer, a to treba da bude dogovor parlamentarne većine, a nakon toga ću ja imati stav. Kao što sam rekao, 41 poslanik treba da se dogovori i kaže šta želi. Bio sam zadovoljan početkom pregovora, ali sam bio iznenađen stavovima pojedinih. U Crnoj Gori beznačajne stvari postaju važne, a važne se zanemaruju.