Američki Federalni istražni biro uključio se u istragu povodom nestanaka i ubistava koji su se u proteklih 13 mjeseci dogodili u gradiću Chillicothe u Ohaju. Porodice i prijatelji žrtava smatraju da je to trebalo da se desi mnogo ranije, ali se ipak nadaju napretku u istrazi.

Od maja prošle godine u ovom mjestu od 22.000 stanovnika nestalo je šest žena, pretežno dvadesetih ili tridesetih godina, od kojih su četiri nađene mrtve.

Većina žrtava su koristile drogu, a najmanje tri su bile zavisne od heroina, saznaje ABC News iz razgovora s njihovim porodicama. Njihovi prijatelji kažu da su se neke od žena prostituisale, a majka jedne od žrtava vjeruje da je to razlog što se policija nije ranije umiješala.

Prva je nestala Charlotte Trego. "Poslednji put sam razgovarala sa Charlotte 3. maja 2014", ispričala je njena majka Ivon Bogs za ABC News. "Rekla mi je: ‘Mama, spremna sam da dođem kući i podvrgnem se odvikavanju od droge." 

Tameka Linch je nestala istog dana, a kasnije se ispostavilo da su se ona i Charlotte poznavale. Tijelo Linch-ove nađeno je tri nedjelje kasnije, 24. maja, u riječici Paint Krik, koja protiče pored Čilikotija.

Njena majka Angela Robinson otkriva da joj je policija rekla da je Tameka umrla prije nego što je bačena u rijeku, što, smatra ona, navodi na zaključak da nije umrla nesretnim slučajem.

Wanda Lemons (37) nestala je šest mjeseci kasnije. Majka je petoro djece i ima dvoje unučadi. Njena majka Dina Vilet rekla je za ABC News da je njena kćerka u vrijeme kada je nestala “koristila drogu”, uključujući i heroin, ali da nije sigurna da li se bavila prostitucijom.

Shasta Himelrick je četvrta žena koja je nestala, na Božić, 25. decembra 2014. List “Chillicothe gazet” pisao je da je dvadesetogodišnja djevojka bila trudna i da je njeno tijelo nađeno u obližnjoj rijeci, drugog januara 2015. Prilikom obdukcije u njenom tijelu su pronađeni tragovi oksikodona i kokaina, ali doze nisu bile smrtonosne. Istražni sudija je ocijenio da je riječ o samoubistvu, jer na tijelu “nije bilo tragova povreda nanijetih prije nastupanja smrti”.

Tiffany Sayre je nestala 11. maja. Poslije dvomjesečne potrage, tijelo majke dvoje djece nađeno je u šumi 20. juna, umotano u čaršav.

“Bijesan sam i duboko nesretan. Sve što znam je da ćemo te uhvatiti, ko god da si, dolazimo po tebe”, rekao je njen otac Tomas Kan na kanalu WSYX.

Kako navodi “Chillicothe gazet”, istražitelji ispituju da li je slučaj Timberly Claytor, koja je ubijena iz vatrenog oružja, povezan sa ostalim slučajevima, mada je policija objelodanila ime osumnjičenog za njeno ubistvo.